BAIRABI LAMAH (Part - I)

    Ni 26 May 2020 (Thawhlehni) tlai lama WhatsApp kan en chu, phai lam atanga lo haw, COVID-19 avanga tangkhangte hmuaka Bairabi train station lama duty tur Medical Team an ruat zingah ka tel ve a ni tih hriattirna (Office Order) lehkha ka hmu a. Medical team an ruat chhuahte kha mi 43 ve ve-in, team hnihah min then a, keini team (Team No 1) ho kha nilaini zana Gujarat leh Madhya Paradesh atanga lo hawte lo hmuaktu tur kan ni. Team no 2 erawh chu a tuk (Ningani) chhuna Karnataka atanga lo haw turte hmuak tur an ni thung a.

    Ruahman lawk ang chuan Nilaini zan dar 7 ah CMO Office, Kolasib atanga Bairabi lam pana chhuak tur kan ni a. A hun a lo thleng ta, zan dar 6-ah CMO Office-a min hruai turin Bolero an rawn tir a, khami zan khan ruah lah chu a sur hnem nasa mai a, engtin nge Bairabi lamah chuan kan tawm hul theih ang tih ngaihtuah ru reng chungin CMO Office lam pan chuan kan inphur chhuak ta a.

    Thui pawh kan kal hman lo, phone call ka dawng a, kan Medical Officer nen kan han inbia a. “Train delay a nih avangin zaninah rel lo thleng tur a awm dawn lo va, naktuk zing dar 5 ah chhuah leh zawk tur an ti a, lo let leh mai rawh u,” a rawn ti a. Ruah sur karah bawk chuan kan damdawiin lam pan chuan kan inphur let leh ta a, min hruaitu tur motor pawh chu a tlan let leh nghal a, ruahman lawk angin kan awm thei ta lo va, kan hmuah tur rel ber a lo thlen dawn tak si lovah chuan kan thulh chu a ni ta reng mai.

    A tuk zingah chuan dar 4:30 ah ka tho va, ka han inphih fai nawk nawk a, dar 5 a rik chuan Ambulance in CMO Office lam chu kan pan leh a, CMO Office atang hian zing dar 6 pelh hretin Medical Team No 1 te chu bus 3, Mahindra Bolero 2, Ambulance, Mahindra pick up etc hmangin Bairabi lam pan chuan kan chhuak ta a.

Bairabi thlen veleh Selfie nghal a tul a... Hahaha

     Zing dar 7:30 vel bawrah Bairabi rel chawlhhmun chu kan thleng thla a, Sipai leh official duty tur mi dangte bakah Aizawl City Bus khalhtute chu an lo phu mur mur tawh a. A hmunah kan SMO in thil pawimawh sawina hun te a hman zawh chuan kan han ngaichang deuh a, kan nghah ber - rel chu chawhma lamah pawh a lo la thleng hman kher lo maithei an ti leh ta! Kan SMO hian min hrilhfiah chipchiar nasa mai a, fimkhur lah an fimkhur bawk. A thusawi tam tak zinga ka la hriat reng chu, "Nangni ho zinga mi pakhat lek inthlahdah leh fimkhur loh vang hian Mizoram pum a buai thei," tih leh, "Khua a lum em a, glove in thlak duh fo dawn, Glove in phelhin table hnaihah emaw, table chungah emaw in phelh tur a ni lo, in han phelh ang a, thlan a lo luang chhuak dawn a, a dirin a dir zawih zawih dawn, chuvangin, in document pawimawh ;leh paper dangte a huh chhiat vek loh nan, leiah in fartir tur a ni," a tih kha.

Chaw ei tur a lo thleng e

Chaw dawh tura in line chhung pawh a rei fu mai, khua a lumin ni a sa thei si!

    Zing dar 9 velah chuan tukthuan kan ei a, a hmuna ei tur an lo buatsaih sa chu kan ei a, khualzin tangkhangte chu sawi loh, Bairabi lama duty te ei tur ringawt pawh kha buaipui hautak tham zet a ni. Chaw dawh tura kan intlar lai te chuan Sawrkar sum leh pai luan ral nasat tur zia te chu rilruah a lo lang ve nasa mai.

    Chaw kan ei fel hnu chuan kan han nghak deuh vang vang a, chhun dar 11:30 chuan min ko khawm leh ta a, chutah chuan, vawiinah rel a lo thlen hman loh tur thu an sawi leh ta daih mai. Awmze nei lovin kan zuk inphur liam thla ve ringawt chu a ni leh ta mai a, mi dang chu sawi ta lo ila, ruahman lawk ang lova thil a thlen tak thut avanga Medical Team, mi 43 zette kal thlawnna senso pawh kha a tam dawn mang e ka ti rilru a, Medical Team lama kan hotute leh Railway lama thawktute inkarah communication tha deuh chu awm se, a lo thlawna sum luangral tur tam tak kha kan hum thei awm mang e aw tih rilrua ngaihtuah chungin haw leh tur chuan Bus-ah kan lut leh ta dial a.

Tangkhangte phur tur Aizawl City Bus in rel lo thlen hun an nghak

    Chutia kan rel nghah ber a lo thlen tak lovah chuan, Zan dar 6-a Kolasib CMO Office atanga chhuak nawn leh tur chuan kan haw leh ta a ni.

(A sei deuh avangin Part-2 ah kan chhunzawm leh dawn nia)