BAIRABI LAMAH (Part - II)

    Bairabi lama kan chetvelna chungchang chu BAIRABI LAMAH (Part-I) tiin ka lo ziak tawh a, Part 2 in i han chhunzawm ang hmiang.

    Part 1 lama kan sawi tawh angin, train delay thut thut avangin kan hotute ruahman lawk angin thil a kal mumal thei ta lo va. Keini, Team No 1 te, Gujarat leh Madhya Pradesh atanga lo hawte hmuak tura ruat lawk pawh chu an tidanglam leh ta chuk chuk a, Team 1 leh Team 2 te a ruala kal turin ruahmanna dang an siam a, hemiah hi chuan a khaw per deuh keini leh Kawnpui PHC Staff kan vaiin mi 10 te chu min awl ta thung a. Ningani zan (28.05.2020) dar 7 velah Medical Team 1 leh Medical Team 2 te chuan keini tel tawh lovin Bairabi lam an pan ve ta thung a, an vai hian mi 70 chuang an ni.  Anni ho hi Gujarat, Madhya Pradesh leh Karnataka atanga lo haw mi 1800 velbawr buaipuiin ruah sur karah an tlaivar ta thak a, an hah ngawtin a rinawm.

    Laklawh deuha ka han sawi tel zawk duh chu hemi hma hian Tamil Nadu atanga rawn haw te pawh Medical team dangin an lo dawngsawng tawh a, hei erawh hi chu ka tel ve loh avangin han sawi zui tur ka hre lo.

CMO Office (Kolasib) atangin kan inzui chhuak thin

Chaw hing leh a behbawm
    Sawi tawh ang khan Gujarat leh Madhya Pradesh atanga lo haw tur, mi 629 te hi Nilaini zan (27 May) a Bairabi rel chawlhhmun rawn thleng hman tura beisei an ni a, chutiang bawkin Karnataka atanga lo haw tur, mi 1541 te pawh Ningani chhunah (28 May) lo thleng tura beisei an ni bawk a. Amaherawhchu, kawng lakah harsatna neuh neuh avangin train schedule an thlak thut thut a, Medical Team te leh Official duty dangte pawhin kan nghak thlawn ngun malh malh viau. An zavai hian Ningani zanlaiah an lo thleng thei hram chauh a. A hma daih atangin Sawrkar a lo inbuatsaih tawh a, an ei leh in tur pawh lo buatsaih fel sa diam a ni a. Chutih lai chuan, zirtawpni zing lam (Ningani zanlai) a an lo thlen tak chauh avangin an ei tura ruahman lawkte pawh a rim a lo tui lo deuh hman a ni awm e.

    Hetianga state pawn atanga rawn hawte hi anmahni awmna district theuha Quarantine Centre-ah khung hran tura ruahman an nih angin Bairabi rel chawlhhmun atang hian Bus-a phurh chhuah an ni thin a. Kawng lakah din kawi an phal lo bawk nen, an ril atamin an chau ngawt ang tih chu hriat sa a ni.

    Hemi tuma chaw hing hi Social Media lamah sawi neuh neuh a awm deuh niin a lang a. Amaherhawhchu, a hnua Bairabi lama Duty-a kan kal leh tumin a buaipuitu DC Office staff te ka han zawt ve nual a, anni chuan, “Chaw a hing tih an rawn sawi khan kan la let leh vek a, a aiah thei tui (Frooti) leh chhang (biscuit) kan sem leh vek e,” an ti a. Chawpchilh tak maia an ei tur han ngaihtuah that leh kha a luhaithlak an ti ve hle.

    Tun tum atan chuan heti chin hi ni leh phawt se, remchang hmasa berah part 3 a chhunzawm leh tum ila. Part 3-ah chuan Delhi atanga lo haw te chungchang tarlan kan tum dawn nia