KEIMAH HNAPA!

Tin, heti hi a ni a. Mi tam takin WhatsApp messenger an hmelhriat tawh hnu leh, Mizo zingah ngei pawh a khawih hmasa pawlte'n kum khat chuang fe an lo luhchilh tawh hnu khan, an sawi luai luai WhatsApp chu ka khawih ve ta alawm le. Thiante zingah pawh kawng engkima a hnufum pawl ni char char thin tan chuan khatiang thil thar han luhchilh ve thut mai kha chu buaina a tam teh e! 

Tichuan, kan thianho group siamah chuan min add ve ta ngei a. A hmaa vairam sim card ka hman thin avangin tuna ka number thar, WhatsApp ka khawihna number chu kan thianho zingah pawh mi pahnih khat bakin an hre lo va. Chu chu remchangah hmangin kan thianpa pakhat chuan, "I hming pangngai hmang lo la, hming dang invuah la, i thlalak tarlang lo bawk la, an buai nasa dawn a, engtin nge an tih reng reng hriat pawh a chakawm alawm le," tiin thurawn fahrah zet mai chu min pe a.

Kei lah, a nawi chi lo nih ve bawk nen, ka ngaihtuah a, thurawn tha tak niin ka hre tlat! Tichuan, ka hming pangngai ni lo, hming dang hman tur chu zanah, khuma mu chungin, bengsik meuhin ka ngaihtuah ta a. Common lo si, mi hriat hlawh deuh tur si ka duh ve khanglang bawk nen, eng hming nge ka i phuah ang tih ka ngaihtuah nasa viau a. A tawpah chuan Hnapa tih hi rilruah a lo lang ta a. Chu hming lem tuihnai lo zet chu ka pu chho ta a ni.

A tirah tak phei chuan Hnapa tih mai duhtawk lovin Rev. Hnapa ka han inti deuh kher pek a! Amaherawhchu hun eng emaw chen ka hman hnuin, Pathian leh a kohhrante tana hun puma puithiam hna thawk tura kohte leh thlante, Pathian hriakthihte an kohna Reverend tih hi fiamthu nan mai maia hman ka inthlahrung ta viau a; nihna zahawm leh mi bikte tana an dah - hming thianghlim lo uanpui hi Siamtu pawisawina ni tlatin ka hria a, thil tihchi ber niin ka hre thei lo va, Reverend chu paihin Hnapa tiin ka indah leh ta zawk a. Uanpui chi pawh a ni lo bawk reng a!

Thian thenkhatte atangin zawhna ka dawng hnem malh malh khawp mai. Hnapa ti khera ka indah chhan hi an hre duh thin niin ka hria. Ni e, a then chuan tawp leh tenawm an ti a, a dik reng. Mahse, uluk taka ka ngaihtuahin, Hnapa ka nih a tulin ka hre miau si. Kha zan, WhatsApp a ka hming lem invuah tur ka ngaihtuah laia ka rilrua thil lo lang hi tarlang ve reng reng teh ang:

Midum kawng laiin sap pachal anga a inngaih tlat chuan mi nuihzat bak a hlawh ngai lo. Chutiang chiah chuan kei ngei pawh hi lunghlu emaw inti tlat ila, mi nuihzat bak ka hlawh dawn lo chiang - Hnapa ka ni miau va!

Engvangin maw?

Ni e, hnap hi thil tuihnai leh awh-awm a ni lo chiang a ni. Mi tinin kan nei vek chungin kan taksaa awm ve reng zinga kan ngaihhlut loh leh kan nin em emte zinga langsar ber pawl, țangkaina nei lo ang hrima kan suasam a, kan paihchhuah fo a ni tih kan hre bel viau.

Mahse, ka'n ti teh ang. Zir mite chuan hnap hian kan taksa tan hian hna pawimawh tak a thawk ve reng niin an sawi ve tlat!

Medical lama mithiamte chuan hnap hian kan chuapa bawlhhlawh lut tur lo dan/dal leh paih chhuah kawngah hna pawimawh tak a thawk a ni an ti tlat asin. Chuti chung chuan keini erawh chuan kan ningin kan hne hle a nih hi maw! Paih chhuah dan mawlh kan ngaihtuah a, midangte hmaah kan zahpui fo thung si.

Ni e, mahni nihna inhriatchian tluka hlu leh țangkai a awm lo an ti țhin a, a dik ang. Mahni nihna leh theihna chin tawk hriat hi a pawimawh a, chutiang pawh hrethiam lo tan chuan hmuhsitna bak hlawhchhuah tur a awm lo. 

Ka theihna ka thlir a, heti mai hi ka ni tih ka hria a, i tan thil hlu leh rotling, rangkachak leh lunghlu hu nih chak viau mah ila, ka theihna, thiamna leh finna ten a phak miau lo va. I tan hian ninawm mai niin lang mah ila, engtikah emaw chuan i natna tur lak ata venghim tur che talin i tan ka lo tawlh țhin dawn a ni. 

Keimah Hnapa ka ni miau va!