Hmanni mai khan kan ṭhianpa, thla thar (March) a nupui nei mai tur chu mo lawmna ruai buatsaihna tur thing lain kan pui a. Khua a lum a, thlan a tla ve nasa a, tlai lamah phei chuan kan lo ngo vak lo bawk nen, kan hmai pawh a tliang hlurh tawh a! Chu lai tak chuan kan U Nghakmawia hian ka ṭhu hahchawl lai chu thla min lo laksak chu niin... Make up chhuak thar leh ṭha ber ber nen pawha ka mawi loh tehlul nen, tuna thlalaka in hmuh ang hian ka va han chhe chiangkuang lehzual tak em ve aw! Chu thlalak (tuna i hmuh lai ngei mai hi) chu WhatsApp a KṬP group ah a rawn post a. Chu hmel kutdawh zet hmang chuan eng ráu emaw ni hian min rawn pawl ta a.
Chu thlalak chu ka han en nawn leh ṭhin a, keimah ngei chu ka ni si; mahse, ka facebook profile picture nen a va inang si lo em (midangte ang thovin)! Keimah ve ve ka inang ta tlat lo mai. Ka facebook profile picture en chuan V-day a present dawng ve ngei turte zinga chhiar tel ngei ngei tur ka ni a; thing lak ni thlalak en erawh chuan hetia eng mah ka dawng lo hi vui ngam tur erawh ka ni si lo. Chutiang khawpa inkar hlat thlalak chu heti hian hmun khatah dahin i hmuh theih turin ka rawn chhawpchhuak a ni a. Chutiang dinhmun velah chuan heng a hnuaia i chhiar tur thu nawi te te hian ka rilru a luah ve a ni.
Amah Zephyr Mapuia khan an drama ah khan, "Mizorama mipui tam zawk hi milem kan ni a..." a tih khan ngaihtuahna a tikal thui viau
A ni tak a, mi tam tak hi chuan rinawmna phenah phatsantu thinlung kan thukru fo va. Lungngaihna mittui hliah turin hlimna hmaikawr kan vuah ṭhin.
Eiruknaa din in mawi leh nalh tak bangah Pathian thuziak kan tar tlar pût a. Pathian Biakbuk lamtuala kan Amen thawm pawh a reh fel hmain Biakin kawtah kan ṭhenawmte kan rel chhunzawm fo. Hre reng chunga bawhsual lui chungin rawngbawlna chanvo pawimawh leh langsar kan um a, kan nihna dik tak thup nan Kohhran kawrah hmangin kan lan mawi theih nan rawngbawl hna kan hmatheh a.
'Ka hmangaih che, Dam chhungin i tan chauh ka rinawm reng ang' kan tih mawlh mawlh laiin, a tuk lawkah chuan midang kan hmu tai leh thung si ṭhin a. Dam chhung atana 'tiam tlat e' kan tihpuite lakah ngei pawh kan rinawm zo lo fo chu a nih hi!
Hetiang thinlung putu nang leh kei hian kan nihna dik tak, kan hmel dik tak hi kan phawrh chhuakin kan tarlang ngam ta ṭhin lo va. Kan nihna dik tak thup nan mawina derdep kan inbel a.
Hringnun khawvela mawina derdep hmanga inthuam mawi chawp ṭhinte hian nakin lawka kan tan chatuan khua a var hunah chuan lei leh van Siamtu hmaah engkim chiang takin kan puan a la ṭul ang. Chumi hun chu a lo la thleng ngei dawn a, i inpeih tawh em?
No comments:
Post a Comment