HLA PHUAHTU ROPUI HANDEL LEH HALLELUJAH CHORUS

Kum 2011 ni tain ka hria, kan Branch KṬP fellowship ah thupui thlansa bik Hla leh a phuahtute tih sawi turin min ruat ve hlauh mai a. Hei hi KṬP hungchhunga hun ka neihna hmasa ber a ni nghe nghe. Chuta ka thusawite zinga pakhat chu ka han pho chhuak ve reng reng ang e. -  Angaiha Chhangte

George Frideric Handel, Hla phuahtu hmingthang tak hi February 23, 1685 khan Germany-ah alo piang a. A pian lai hian a pa hi kum 63 mi lai a ni tawh!Germany hi a pianna ram ni mah se, A damchhungin England-ah hun a hmang tam ber thung. Hla phuahtu hmingthang a nihna chu kan hre vek ang a, Handel hian Henry Purcell a ngaisang a, kawng tam takah ani  hian a influence viau niin an sawi.

A damchhungin hla a phuah hnem hman hle a. Opera 42, oratorios 29, organ concerti 16 mai bakah genre dang chi hrang hrangah hla 120 chuang lai a phuah hman a ni. Heng zinga a lar ber chu “Messiah” a ni a. Mizo ten kan hriat lar em em, Halleluiah Chorus pawh hi Messiah a phuah atanga lakchhuah a ni.

Hla phuahtu ropui a nih mai bakah hian Musical instrument khawih lamah pawh a duai lo hle. A hunlaia rimawi an tumna hmanrua awm ang ang kha chu a play thiam vek a ni deuh ber mai. lute, trombone, harp, double basson, clarinets, small high comets, french horn leh bell chimes te chenin a play thiam vek a ni.

Hla a phuah hnem em avangin a zavai chuan sawi kim sen a ni lo vang; Mizoten kan hriat lar ber Halleluiah Chorus (Hallelujah Chorus) hi lo luhchulh zuai ila:


Hallelujah Chorus hi Kum 1741-a Handel-an a phuah a ni a. A phuah lai vel hian harsatna tam takin a tlakbuak a, leiba tam tak a neih avangin a rilru a hah em em a, tunali tawng takin hla phuah mood-ah a cheng lo a ni ber mai! A huphurh ve hle mai a. Nimahsela ni 24 chhung lekin a puitlin hman vek a ni.

A phuah laia a rilru hrehawmna leh sum lama a tlakchhiatna hliahkhuh vek khawpin a phuah dan chanchin hi a ropui a ni. Handel-a assistant chuan reilote chhung a hla phuahna room atanga lo chhuak lawk turin a ko va, nimahsela Handel chu engmah sawi lova a reh vung vung si avangin a assistant chuan a hlaphuahna room-ah chuan a luhchilh ta a. Engvanga lo chhuak miah loh nge a nih thu a zawh chuan Handel chu a tap chhuak ta a. “Pathian Hmel ka hmu a ni,” a ti!

Hallelujah Chorus-a hla thu (lyrics) te hi Thuthlung Thar-a Thupuan bu ami hmun 3 atanga lakchhuah an ni a. Chungte chu Thupuan 19:6, 19:16 leh 11:15 te an ni.

Thupuan 19:6 – Tin, mipui tam tak aw ang leh tui tam tak ri ang leh khawpui nasa tak ri angin, “Halleluia, Lalpa kan Pathian Engkimtitheia chuan ro a rel tak hi...”
Thupuan 19:16 - Tin, a puanah leh a malpuiah chuan “Lalte Lal leh Hotute Hotu” tia hming ziak a awm a.
Thupuan 11:15 – Tin, Vantirhkoh pasarihna chuan a han hâm a, tichuan, “Khawvel ran chu kan Lalpa leh a Krista lalna ram a lo ni ta, ani chuan chatuann ro a rel ang,” tiinvanah chuan aw ring takte a lo chhuak ta nghal a.

Kan kumhlun lohna tur khawvelah hian dam reng theih a ni miau si lo va, Hla phuahtu ropui berte zinga mi George Friderick Handel chuan April 14, 1759 khan he khawvela a zinkawng chu a lo zawh tawp ta a. Nimahsela he khawvela Pathian fakna hla zaipawlten an sak chhung chuan a hming hi a dai tawh ngai lo vang.