A tak ram chang thei tura ka beisei hauh loh hi suangtuahnaah ka din puitling fo va. Ka chhehvela min hualveltu mi tam takte karah hian, chu ka suangtuahna ramah chuan mahni chauhin ka cheng fo va, chu hmunah ngei chuan a ni, kei chuan hlimna thuruk ka chhar ṭhin ni!
Ni e, engtik lai maha ka phu loh leh ka cho zawh ngai hauh loh tur nang ngei kha ka ta han ni tehreng la, eng ang taka hlimna nge ka tawn ang ka hre thiam lo. Duh thuhmun, tum thuhmunin rilru hmun khat han pu tehreng ila. Chutiang hun chu han thleng thei ta hlauh se chuan, zana nangmah rim tura ka rawn len ve chang pawhin tlaivar ṭhakin ka thlir peih che hian ka ring a!
Tunlai khawvel, changkanna-in a thuam velah hian, I cellphone changkang zet khan zing I thawh chiah thu mai mai te hi min rawn hrilh ziah la, he ka phone zai thei ve satliah mai pawh hi ka melh nui vur vur chiang sa! Chhun lamah I hun hman dan a kip a kawiin, thil ho te pawh ni se, min hrilh ve ziah ta la. I hnathawhna hmun I pan laia kawngsira vai thirchhe zawng lo ding mek I hmuh thu te nen lam min hrilh fo ta la. Khawpui tawt taka motor kawngpui kan harsa I tih ziate nen lam I hnen aṭang hian hre ta zel ila. Chu mai a ni lo, In in I chhuahsan dawna in ṭhenawmte uiin a lo bauh thu chenin hre ve ta zel ila.
Tukina I chaw chhum I theihnghilh avanga chaw kang in ei thu te hre ve zel ila, Pathianni zinga sa azawnga I ngainat loh ber vawksa in hmeh ṭhin avanga chaw ei puar har I tih ṭhin thu nen lam min hrilh fo la.
Thil ho te te-ah kei ka nih vang hrim hrimin han lungawi lo der fo la, ka thlem lungawi phutin titau chhen bawk la. Khawi lo kal ni khuaa kan inzui chhuah changte hian ni danga nangmah chauha I kal theihna hmun ngeiah pawh kaih han ngai deuh ta tlat la. Khawi hmunah emaw inhnawh puar tura thingpui dawr (restaurant) kan panin, ei leh in man tur daih aia tam fe pawisa ak mah la, pek kep zel ngai ta tlat la. A chang phei chuan mi hmuha mawi lo khawpin eitur barh deuh chawt chawt te han phut fo la.
I tuina leh I chemkalna lam ni miah lo pawh, ka kalna leh ka tuipui zawng a nih chuan min han phurpui em em ringawt mai la. Mi azawnga thu thiam lo ber – kei hian ka sawi ang apiang hi ngaihnawm ti deuh tlat ta mai la, ka kutchhuak tlawmte, midangte kutchhuak el pha hauh lote hi chhuang ta em em la, a ṭha ber ni awm fahranin han fak vel ṭhin la.
Engmah lovah pawh ka ngaihdan hre chak tlat la, thil ho te-ah pawh ka chhanna nghak tlat ṭhin la. Chhun chawlh laia I kawra thingpui I intihbuak palh avanga tlai lam thlenga I buai phah thu te han hre lehzel ila.
Eng emaw lei tura I chhuah dawnin min sawm ve ziah la, khawiah emaw in Ina tar tur frame mawi tak I hmuhte chu leisakna tur che sum ka neih loh vangin lei lovin haw leh ringawt ila, mi tam tak, harsa lo taka chutiang man tur sik chhuak mai theite karah chuan lungawi lo chuang hauh si lo la!
Changkannain a tuam vel tunlai khawvelah hian, midang tute emaw chu lirthei chhuak thar ber ber nena khawii laiah emaw hlimna leh nawmsakna zawnga a tunlai thei ang ber an um mek lai hian, nang erawh chuan khawl chhuak thar leh changkang tak tak ri bengchheng leh khawpui boruak lirthei khuin a bawh buai chuk ṭhin tlansanin, tlaiberh nupa inchhai ri leh uṭawk nupa inhau thawm hriat theihna hmunah kal han rawt ta tlat la. Chu hmunah ngei chuan I sam sei siau mai chu thliin han chhem phe der der se, chu I sam leng vel chuan ka hmaiah rawn tawk leh zeuh ṭhin se la. A thlang lawka kawrte tui, damdawi hman ngai hauh lova khuarelin a tihthianghlimsa ngei mai chuan kan dang hnawn leh zeuh ṭhin ila.
Zan lamah I hmel hmu chaka in In lam ka rawn panin, lirthei ṭha ka neih loh avangin tlai takah lo thleng ila, nang heltu mi dang ṭhenkhatte an ṭhut nual tawh karah inthlahrung takin in kawngkhar rawn kik kerh kerh ila, phur em ema kawngka hawngin min han nuih seih la.
Chutiang hun ngeiah chuan a ni, an sawi fo ṭhin khawharna ngei pawh hi kan kiangah khawhar taka a awm dawn ni!
Ni e, thil mawi kan duh a, hlimna kan um a, hmangaihna nihphung kan chhui fo va, ril deuh turah kan dah a, mi dangte chanvo turah, kan ban phak ve loh turah kan ngai châwk. Chutih rual chuan heng - mawina tak tak te, hmangaihna dik tak leh hlimna tluantling kan zawn ṭhinte hi thil mawl te te, kan hmuh kân fo ṭhinah hian a lo inphum ru fo zawk lo vang maw?
No comments:
Post a Comment