Kut ruaka kan chhuahsan leh mai tur he leiah hian kumhlun tur kan awm lo tih hre reng mah ila, damchhung khawsak lungkhamna chuan min chim lo thei bik si lo; mihring ka ni miau va! Tichuan, he intlansiakna-a khat hringnunah hian midangte ruala tlan ve zel thei tura ka ke pen ka chheh rem ve zel a tul a, chutiang tur chuan mahni in lum chhuahsanin India ram chhim tawpah, hnamdang karah ka khawsa ve naw naw a.
Khatih lai khan Ani nen khan kan intawng a. Chu thil chu ka lo beisei lawk ngai loh leh ka suangtuahna khawvelah pawh ka lo ngaihtuah ngai hauh loh a ni. Mahse, hma lam hun hriat lawk theih miah lohna hringnunah ka cheng ve miau va, a lo thleng ve mai a ni!
Kan inkawm nel tial tial a, hun a kal zel a, thian tha satliah chu kan ni ta lo! Mipa leh hmeichhia kan ni miau va, kan karah hmangaihna a piang ve ta tlat a! Kan inpawhna a thuk tial tial a, hmangaihna khurah kan tlu lut ta nge nge a.
Kan kar a hla a, mel za tamin kar min dan a. Ka taksa chu hetah awm mah se, ka thinlung leh ngaihtuahna erawh chu a kiangah!
Thu ho tak tak kan sawi a, in nuihsawhna tur ngawt kan zawng a. Chutia duh tawka kan han inbe tak tak chu darkar khat hi rei lo tak a ni!
Tum khat chu zan dang ang bawkin kan inbe leh ta ngei a. Chumi zan chuan thla a eng kher bawk a, kei chuan, "Thla khi en teh, a eng mawi asin, kan kar a hla si a, i aiawhtu angah ka ngai mai aw," ka ti ve zân a. Ani chuan, "Ka duh teuh lo mai"
"Eng vangin maw?"
"Khi thla eng khi a chapo lutuk!"
A chhanna tawngkam chuan ka nuih a tiza kher bawk a, ka nuihsawh fe hnu chuan vin takin a aw a rawn chhuah a, "Min nuih suh."
Kei chuan, "Eng vangin nge ka nuihsawh loh ang che? Thil nung pawh ni hlei lo, thla eng mai maite i khing tawk em em a, chapo te i ti mai mai. Nuihsawh loh theih i ni hleinem," tih pah chuan a aia uar sauhin ka nui lui leh vak kher a.
Ani chuan, "En ta che, a ên dan em em khi, a chapo alawm. Arsite mawina zawng zawng pawh a hliah bo vek khi; kei chu thla nih ka duh lo, arsi nih ka duh zawk," a ti bung nghut a, thil dang kan sawi zui ta zawk a.
Ka han ngaihtuah lêt a, kha tawngkam maksak tak kha fiamthuin phuh chhuak mah se, a tawngkam khan a chhungril nun a puang chiang viau zawk a lo nih dawn hi te ka ti leh ta hnuhnawh a.
Midangte aia lansarh tum theuhte intihsiakna hringchan tual zauvah hian, Ani kha chu langsar nih hlauvin a biru tawk tawk thin! Chawimawina hi a tan chuan 'eng emaw mai mai' a ni a, lansarhna leh hmingthanna hi ropuinaah a ngai ve lem lo a ni ang, chutiang lam hawi thei thil reng reng chu a ngaihsak duh lo em mai! Chu thil chu inngaihtlawmna nen lo chuan neih theih a ni lovin ka hria a, a hmel ka ngainat aia nasa zawkin a chhungril nun zunah chuan ka uai nghet ta sauh zawk a!
No comments:
Post a Comment