Zirna leh eizawnna thil avanga mahni in lum chhuahsan a tul avangin kum 2011 atang kha chuan hmun dangah ka awm bo va, tunah chuan mahni venga haw châng pawhin mikhual emaw min titu an kat nuk tawh mai.
Chutih lai chuan kan KTP Branch Secretary hnen atangin lehkhathawn ka dawng nawlh mai a, ka han en chiang a, sawmna lehkha a lo ni a. Chu sawmna lehkhaah chuan kan Branch chanchinbu Thalai Entu chhuah tan atanga a kum 25-na champha lawm tur a nih thu leh he lawmna hunah hian kum 1993, a chhuah tan kum atanga kumin 2018 thlenga chanchinbu enkawl hna lo thawk thinte an sawm thu leh chawimawina thuziak hlan an nih tur thu a lo inziak kuau mai a, ka va phur tehlul em! Pathianin rem a tih chuan kal ve ngei ka tum nghet hmiah a.
A hun a thleng ta, Ni 8 October 2018 zan dar 6:20 ah chuan Leitan Kohhran Hall ka thleng chho va, kan pa te rual tam tak pawh an lo tei suau suau tawh a. Dar 6:30 ah chanchinbu Silver Jubilee lawmna hun chu kan hmang tan ta a.
Branch chhunga kan chhuanvawr zaithiam tak takte zai kan ngaihthlak hnuin, a duh apiang tan thusawina hun hawn a ni a. Kan mi hmasa ten an experience an share ho kha a ngaihnawm hle bakah, a challenging viau. Harsa taka an lo kalpui hram hram dante an han sawi a, hnuk tiulh thei dawn dawn khawpa lungkuai pawh a tam mai!
Tum khat chu, Branch in computer hmanga chanchinbu a buatsaih ve tantirh khan zing dar 2 thleng mai U Tetei ten rim zetin chanchinbu an chhu a, an chhut zawh hnu chuan U Opa hian eng emaw ni ka lo hmet palh a a ti; tichuan, a vaiin a bo ta vek mai a. U Opa lahin a sawi ngam tawh si lo, a tukah Louis Bet ah print turin an keng thla a, an print dawn chuan an han open a, chanchinbu print tur chu a lo blank vek!
Editor in chief hmasa ber Pu VL Roluahtuma'n an hunlai chanchin a sawi ve a. A chanchinbu hming Thalai Entu a nih angin eng emaw eng lam kha han tihlan an duh si a, Editor in chief ber khan a title a hman tel turin bati lem te kha a ziak chawp ta nawk a! Chhuah tur hi a vang thei khawp a, a phek hnung lamah chuan milem te kan ziak khat mai thin a ti!
Editor hmasa ber Tv. C. Lalawna (tunah chuan Leitan South kohhran upa a ni tawh a) ngaihhlutna kha a ropui ka ti a. Ani phei kha chuan an hunlai chanchin sawi pahin kum 1994 vela faith promise khawnna ip leh KTP membera inpekna form a lo dahthat vang vangte a rawn keng chhuak hial a.
Upa Thawma editor laiin, an inah chanchinbu an chhut thin thu U Lalthanin a rawn sawi a. Wai wai bawm hnih hi chanchinbu chhutnaah kan keng thin a a ti; Upa Thawma fate, naupang te te an la ni a, an lo pe ve ngai lem si lo va. Zan khat chu Upa Thawma nupuiin, "Zanin atang chuan naupang ei tur wai wai kan lei ve tawh dawn," a lo ti hial a ni awm e!
Tun hmain mobile phone te la chhuak hek lo, kohhran inkhawm programme ringawt pawh lakkhawm harsa tak tur a ni tih a chiang reng a. Kan biak in atanga hla tak, Nl Tetei (Ramsiamliani) te ina an chanchinbu an chhut thin lai chuan zan dar 11 ah te kan kawmchhak pa U Davida hi biak in notice board a inkhawm programme en tura an tirh liam thin thu an sharw te kha a ngaihnawm takzet.
Pa Rintluanga editor laiin cyclostyle chhia hawn risk a huai zia te sawi lan a ni a. Chanchinbu an han her a, dar 2 velah khawl a nuar a, Pa Rintluanga hovin U Ramchhana ten an han hawng risk pawp mai a, Pa Rintluanga chuan a han vuah khawm leh dawn a, a part thenkhat lo chuang ta tlat thinte a awm a ni awm e! Tlaivar a awl thin khawp mai U Ramchhanan a ti.
Upa Lala te meuh pawhin an hunlai mil zelin chanchin maksak leh nuihzatthlak an lo nei teuh a nih hmel a. Chanchinbu kan chhu a, kan chhut zawhah haw ta mai lo chuan card kan deng chhunzawm nghal thin a ti heu mai a, ngaithlatute kan nui nasa.
Branch Comittee meeting an neih laia cheh tur, kuhva ro baltin khat kuhva chehna nen committee na hmuna lo keng ta mai te, Nu Rinsiami te ho la phiar tur nena kal tlat thin te, chanchin hrang hrang ngaihthlak kha a khamawm loh takzet. Hunin min daih lo mai pawh a.
Pu Vanlalhriata Pachuau a ding a, an hunlai a rawn sawi a, chanchinbu lay out design vela editorial board ho an phur theih em em thu a sawi a, kum tir lam phei chuan issue tin kha a layout kan tidanglam thin a ti! An tuina zawng ni miau hek.
Tam tak chu kan kohhran chhunga lawi ve tawh lo, hmun danga awm ta te an ni nawk hlawm a, an lung a leng tlang a ni ang e, U Atei (U Biakkunga nau) lo ding chhuakin mittui tling pum khawpa a lunglen thu a sawi te kha a hun lai hre ve pha lo tan pawh a lunglenthlak ve em em.
Pu Lalbiakmawia (U Bma) te, u Rinpuia ten Thalai Entu chanchinbu avanga mizoram pum huap chanchinbu an enkawl chhoh dan leh, an department awmna hmuna an tangkaipui dan an share te kha a ngaihnawm takzet a.
Kei tehlul pawh hian 'chanchinbu kan enkawl ve lai khan' ti-a sawi chak tepp kha ka nei ve nual a. Mahse, keini aia inpe thuk zawk leh tawnhriat ngah zawkten an hunlai chanchin an sawi lo ngaihthlak kha ka tan a hlawk zawk tih ka hria a.
Tam tak sawi chhawn tur ka nei a, mahse a sei lutuk dawn tlat. A tul leh part 2 kan ziak leh zawk mai ang chu.
Tichuan, kan mi hmasa ten an tawnhriat tam tak an rawn phawrh chhuak a, nizan inkhawm atanga ka rilru luahtu ber leh in lama ka hawn tak ber chu, Kan thatlai huna Kristian Thalai Pawla lo inhman ve hram hram hi a inchhirawm loh tih hi a ni.
Ni e, tunlai khawvelah hian Kohhran belh tlat te hi kan sawi hnawm titih ta a. Mahse, nang leh kei erawh chuan kohhran bel tlat ang aw! Kan inchhir dawn lo, hun a liam ang a, kan inhmang ve thei hi kan la lawm telh telh ang, an that lai huna thil dang ngaihtuah thinte zawk hi an inchhir zawk thin alawm.
Keini chu Rawngbawl tura Chhandam kan nih kha.
No comments:
Post a Comment